🧁 Entrevista á A Merenguela – Doce sabor, deporte e comunidade

Conversa completa con A Merenguela: historia, valores, comunidade e moito merengue.

“Para nós, A Merenguela máis ca unha pastelería é un lugar onde a xente pode sentirse como na casa.”

1. Para comezar, contádenos un pouco sobre as orixes da A Merenguela. Como naceu o proxecto e que vos inspirou a crear esta pastelería tan especial?

Rafa e máis eu coñecémonos dende hai un feixe, eramos uns cativos; tiñamos amizades en común, pero foi por casualidade que coincidimos traballando xuntos nun obrador, onde el era pasteleiro. Alí foi onde nos fixemos noivos —e onde comezou todo—, porque pasabamos moito tempo traballando codo con codo. Ben, máis ben eu aprendendo e el ensinándome, porque era e é quen domina a arte da pastelería. Eu son a que lle dá o toque feminino 😉.
Co tempo, decidimos cambiar de rumbo para ter unha vida un pouco máis tranquila. Rafa comezou a traballar nunha cristalaría e eu no comercio. Pasaron bastantes anos —14 ben—, ata que, por circunstancias da vida, a empresa de zapatarías na que eu traballaba fíxose en quebra e pechou todas as súas tendas e, pouco despois, a Rafa fixéronlle unha operación importante de cadeira que lle impediu seguir co seu traballo.
Foi entón cando pensarmos: e se volvemos ao que realmente nos gusta? E así naceu “A Merenguela”, desa mestura de amor, experiencia compartida…

2. Que valores definen á A Merenguela e como os poñedes en práctica no día a día, tanto na pastelería como no trato cos clientes?

En “A Merenguela” temos moi claros os valores que nos definen: o agarimo polo que facemos, a calidade en cada detalle e a proximidade cos nosos clientes.
Cada produto que sae do obrador facémolo co mesmo coidado ca se fose para a nosa propia familia. Gústanos manter ese toque artesanal.
No que ten que ver co trato co cliente, cremos que na pastelería non é só vender doces, senón crear momentos fermosos. Esforzámonos para que cada persoa que entra se sinta benvida e atendida cun sorriso. Para nós, cada encargo, por pequeno que sexa, ten unha historia detrás e iso motívate a dar sempre o mellor, ou polo menos esa é a nosa intención.

3. Nestes anos convertéstesvos nun lugar de encontro moi querido. Que credes que vos axudou a crear esa conexión tan próxima coa xente do Milladoiro e arredores?

Posiblemente a naturalidade coa que facemos as cousas; para nós “A Merenguela” máis ca unha pastelería é un lugar onde a xente pode sentirse como na casa.
Gústanos falar con quen vén cada día, lembrar os seus gustos, os seus días importantes nos cales contan moitas veces connosco. Co tempo, esas conversas convertéronse en agarimo mutuo e en confianza.
Facemos o que nos gusta, facémolo con agarimo e tratamos as persoas co mesmo respecto e proximidade. Ao final iso nótase: dende que estamos en “A Merenguela” coñecemos moita xente que agora forma unha parte importante das nosas vidas.

4. Ademais do pan, o café e os doces, na A Merenguela respírase un ambiente familiar. Que é o que máis vos enche de satisfacción no voso traballo?

Sen dúbida, o que máis nos enche de satisfacción é ver gozar á xente. Que che digan que un pastel lles lembra a un sabor da súa infancia, ou cando veñen familias cada fin de semana e fan de “A Merenguela” parte da súa rutina.
Ver medrar os nenos, compartir café con clientela de sempre, preparar unha torta especial para unha ocasión importante ou mesmo prepararlle unha mesa doce… esas son as cousas que nos fan sentir que todo o esforzo paga a pena.
Para nós “A Merenguela” máis ca un traballo é a nosa casa, pasamos moitas horas aquí e formamos unha pequena familia. Con nós está Vero, que traballa ao noso carón dende hai tempo e a quen acollimos como unha máis. Todo se vive cun ambiente moi familiar e cremos que esa enerxía se transmite a quen nos visita.

5. Como patrocinadores do equipo de waterpolo, formades parte dunha comunidade moi unida. Que vos motivou a apoiarnos e que significa para vós esta colaboración?

Para nós formar parte da comunidade do waterpolo é algo moi especial. Decidimos apoiar este deporte porque admiramos moitísimo o traballo que fan as adestradoras e os adestradores e todo o equipo. Detrás de cada partido hai valores como o esforzo, a disciplina, a superación e o compañeirismo.
Esta colaboración ten un significado moi persoal para nós, porque grazas ao waterpolo o meu fillo Hugo atopou o seu lugar. Pasou unha época complicada na que non remataba de sentirse ben nin de atopar o seu camiño e foi neste club onde todo mudou. Viu a luz, recuperou a ilusión e tivo un cambio espectacular. Hoxe é feliz, adora a Xavi, o seu adestrador, a quen ve como un referente.
Tamén está Leo, o pequeno, que pensabamos que ía ser “ATLETISTA”, como el dicía, pero foi probar o waterpolo co club e non o cambia por nada ❤️❤️.
Nós, como pais, só podemos sentir agradecemento; atopeime con xente marabillosa que nos colleu cos brazos abertos dende o primeiro momento. Por iso, para nós apoiar o equipo non é só un patrocinio: é unha maneira de devolver un pouquiño de todo o que o waterpolo nos deu.

6. Vedes algunha relación entre o espírito do deporte e o da pastelería? (por exemplo: esforzo, constancia, traballo en equipo, superación…)

Si, cremos que ten moito que ver; en ambos os casos hai que esforzarse, ter constancia, disciplina e paixón. No deporte, igual ca no obrador, os resultados non chegan dun día para outro: hai que practicar, equivocarse, aprender e seguir intentándoo ata que as cousas saian ben.
Na pastelería trabállase con precisión e paciencia e no deporte creo que é o mesmo: cada detalle conta e o traballo en equipo é fundamental. Ao final, tanto nun adestramento coma nunha receita, o importante é dar o mellor de ti, gozar do proceso e non renderte.
Mentalidade de superación e compromiso.

7. Tedes algún produto “estrela” ou receita que se convertese na favorita da xente —ou mesmo do equipo de waterpolo? 😋

Si, temos varios, pero sen dúbida o máis especial son as mil follas de merengue, que teñen moito que ver co nome de “A Merenguela”.
Estamos nunha zona de paso do Camiño de Santiago e queriamos que o nome tivese unha conexión; así xurdiu “A Merenguela”: é a combinación da Torre da Berenguela —da Catedral de Santiago— e o merengue das nosas mil follas.
Ademais, tamén teñen moito éxito os New York rolls, que elaboramos con distintos recheos: pistacho, Ferrero, Kinder… E as nosas pastas de té personalizadas, que gustan moito. O detalle de personalizalas dálle un plus moi especial, porque á xente gústalle sentirse parte do que facemos.

8. A vida dun negocio local non sempre é doada. Que retos tivestes que afrontar e como os superastes mantendo a esencia artesanal?

Non, non é doado e, no noso caso, os comezos foron realmente duros. Custounos moitísimo abrir: tivemos moitos contratempos coas obras, os obreiros viñan uns días e despois pasaban semanas sen aparecer, a burocracia foi unha auténtica odisea… E, para rematar, colleunos o confinamento xusto no medio de todo.
Foi unha situación moi complicada, porque aínda non tiñamos o negocio aberto, así que non podiamos acceder a axudas nin prestacións. Estabamos en terra de ninguén: nin perdas, nin paro, nin ingreso. Neses momentos, o que nos sostivo foi o apoio da xente achegada, familiares e amizades que nos animaron a non desistir.
E unha vez que conseguimos abrir, o único que nos quedou foi traballar, traballar e seguir traballando, sempre con esforzo, ilusión e moitas ganas de superarnos. A día de hoxe seguimos igual: tentando mellorar cada día.
Igual ca o waterpolo: todo se basea en traballo, adestramento, constancia e superación. Esa é a actitude e o que nos mantén en pé día a día.

9. Mirando ao futuro, que soños ou proxectos tedes para A Merenguela nos próximos anos?

Medrar e seguir mellorando día a día. Gustaríanos seguir aprendendo, innovando e ofrecendo cousas novas sen perder a esencia.
E bueno… eu teño a miña ilusión persoal: encantaríame que algún día puidésemos abrir outra “Merenguela” nunha zona máis costeira. Sempre o digo —e lle dou a vara a Rafa con iso—, pero el é tremendo e frename un pouco, jajaja.
Aínda así, soñar é de balde, e o bonito é facelo xuntos, coa mesma paixón, esforzo e agarimo co que comezamos este proxecto.

10. Para rematar, que mensaxe vos gustaría compartir cos vosos clientes e con toda a familia do waterpolo que vos acompaña?

Sobre todo queremos darlles as grazas aos nosos clientes, por acompañarnos cada día, por confiar en nós e por facer de “A Merenguela” o que é hoxe.
E a toda a familia do waterpolo, por nos ter acollido tan ben e por nos facer sentir parte do equipo —aínda que o noso sexa máis mangas de merengue ca brazos de nadador, jaja—.
Encántanos ver como se goza tanto dentro coma fóra da auga… e tamén na mesa cun bo doce polo medio. A nosa mensaxe sería: “seguiremos poñendo todo o corazón e moito merengue para adozar cada pequeno momento”.
Grazas por seres parte del!
E, como diría —primeiro un papá, coñecido agora amigo e, como non, un gran traballador polo club, sempre tentando que medre e mellore—… ¡VÉMONOS NOS ADESTRAMENTOS! 💙💦

Grazas por ler esta entrevista completa a A Merenguela.