VITORIA NOS PENALTIS ANTE O PABELLÓN OURENSE

Nova xornada das ligas galegas de waterpolo para o CW Santiago, que recibía en Santa Isabel o CWP Ourense na categoría Absoluta Masculina de DH. A priori, era un partido para endereitar o mal inicio dos santiagueses na primeira xornada, pero cun comezo nefasto, tanto en defensa, dando moitas facilidades aos ourensáns, como en ataque, fallando numerosas ocasións claras, parecía que ía continuar a mala dinámica deste inicio de liga, xa que se chegaba ao descanso cun desfavorable cinco a nove e co partido costa arriba.

Pero os santiagueses souberon sobrepoñerse e, cun cambio radical a partir do terceiro cuarto, conseguiron empatar o encontro e vencer na quenda de penaltis para levar unha vitoria final por 16-15, moi traballada. Queda moito traballo por diante para reverter a situación deste inicio de tempada.

Pola súa banda, tamén se disputou o encontro na categoría infantil entre os dous equipos santiagueses, con vitoria do equipo Alento e moi boa predisposición e loita do equipo Brío. Aínda así, houbo unha clara superioridade do equipo Alento, que se levou o encontro cun resultado final de 10-1.

PLENO DE VITORIAS NO DEBUT NA CASA

Segunda xornada das ligas galegas de waterpolo para o CW Santiago. Desta vez tocou debut na casa ante o CW As Mariñas, cun pleno de vitorias nos tres partidos disputados.

A xornada deu comezo coa disputa do encontro na categoría infantil mixta, onde os santiagueses, co seu equipo Alento, venceron sen paliativos os coruñeses, pechando o marcador no terceiro cuarto e vencendo finalmente por 11-1.

O segundo encontro disputado foi na categoría cadete mixta e, ao igual que na categoría infantil, houbo unha clara superioridade dos locais, que se levaron o encontro cun contundente marcador final de 22-5, que xa ao descanso amosaba unha gran diferenza. Isto propiciou que os xogadores menos habituais puidesen ir collendo minutos.

Por último, chegou a terceira vitoria da tarde, esta vez na categoría absoluta feminina de DH. Un partido, como os anteriores, plácido para as nosas rapazas, que acabaron vencendo finalmente por 23-2, resarcíndose da derrota do pasado domingo no inicio da liga

#CWSantiago #Waterpolo #LigasGalegas #WaterpoloGalego #OrgulloSantiagués #Alento #PlenoDeVitorias #lamerenguela

MAL INICIO DAS LIGAS GALEGAS PARA O CW SANTIAGO

Este pasado domingo deron comezo as Ligas Galegas de Waterpolo para o club compostelán, con desprazamento a Vigo para disputar cinco encontros que se saldaron con derrota.

O primeiro encontro en disputarse foi na categoría alevín, onde os santiagueses caeron derrotados cun resultado final de 9-1. Foi un partido no que os nosos rapaces non estiveron acertados tanto en defensa como en ataque, e só queda seguir mellorando partido a partido.

O segundo encontro tamén caeu do lado vigués. Na categoría infantil mixta debutaba o noso segundo equipo, que pouco puido facer ante o vendaval local, que acabou levándose o encontro de forma clara cun resultado final de 10-0.

O terceiro encontro en disputarse foi na categoría cadete e, do mesmo xeito que nos dous anteriores, o equipo vigués foi moi superior e acabou levándose o encontro de forma clara por 19-4.

O cuarto encontro foi na División de Honra feminina, cun resultado de 14-7 para as locais, que colleron vantaxe no segundo cuarto e souberon administrala ata o final.

Por último, disputouse o encontro na categoría absoluta da DH, cunha nova vitoria local por 11-8, grazas a un terceiro cuarto no que os santiagueses erraron demasiado en defensa, dando unha vantaxe de tres goles aos locais, que souberon manter o resultado malia os esforzos visitantes.

DOUS SUBCAMPIONATOS NA SUPERCOPA NO INICIO DE TEMPADA PARA O CW SANTIAGO

Inicio de tempada para o Club Waterpolo Santiago coa disputa das dúas Supercopas Galegas como inicio de tempada. As dúas ante Pontevedra, tanto a feminina, que foi a primeira en disputarse e que rematou coa vitoria do CW Pontevedra por un resultado final de 6-11.

A pesar diso, un bo partido das santiaguesas, que aguantaron moi ben os dous primeiros cuartos, chegando ao descanso cun marcador de 2-4 para as de Lérez, pero cunha gran defensa das de Santiago. O terceiro cuarto foi o que puxo a diferenza final, á espera dun último cuarto que rematou en empate e no que as santiaguesas non se renderon a pesar da diferenza no marcador.

Unha vez finalizado o encontro na categoría feminina, disputouse o masculino, un partido de poder a poder no que os santiagueses, despois dun inicio no que Pontevedra se puxo por diante 2-0, conseguiron darlle a volta ao marcador para poñerse por diante ata tres goles.

Pero un último cuarto no que os santiagueses cometeron varios erros defensivos fixo que os de Lérez empatasen a falta de 10 segundos, decidíndose o resultado na tanda de penaltis, onde Pontevedra estivo máis acertado para levarse finalmente o encontro por 8-10.

Felicitar os dous equipos, tanto o masculino como o feminino, polos seus dous grandes encontros.

O CW Santiago remata cuarto no Campionato Galego Cadete Mixto de Verán

O Club Waterpolo Santiago pechou a súa participación no Campionato Galego Cadete Mixto de Verán, disputado este sábado en Pontevedra, cun meritorio cuarto posto, confirmando a excelente progresión dun equipo moi novo que continúa dando pasos adiante e competindo cada vez máis preto dos conxuntos de referencia da categoría.

O conxunto santiagués estreouse nos cuartos de final fronte ao ACW, nun encontro que dominou de principio a fin. A intensidade defensiva e a superioridade no xogo permitiron aos nosos cadetes conseguir unha contundente vitoria por 21-0, asegurando así o pase ás semifinais.

Na seguinte eliminatoria esperaba o Real Club Náutico de Vigo, equipo que acabaría proclamándose campión do torneo. A pesar da derrota por 12-3, o CW Santiago ofreceu unha gran imaxe, especialmente no apartado defensivo, competindo durante boa parte do encontro fronte a un dos mellores equipos de Galicia. A falta de acerto nas accións ofensivas impediu que o marcador reflectise a igualdade que por momentos se viu na piscina.

No partido polo terceiro e cuarto posto, os santiagueses volveron demostrar o seu espírito competitivo. Un mal inicio obrigou ao equipo a remar contracorrente, pero lonxe de baixar os brazos, os xogadores reaccionaron e loitaron ata o derradeiro minuto. Finalmente, a vitoria foi para o rival por 13-8, deixando ao CW Santiago na cuarta posición do campionato.

Máis alá da clasificación final, o torneo volve poñer de manifesto a evolución deste grupo ao longo da tempada. O traballo realizado nos adestramentos, o compromiso dos xogadores e a experiencia adquirida competición tras competición permiten ao equipo reducir cada vez máis a distancia cos conxuntos punteiros do waterpolo galego.

Desde o Club Waterpolo Santiago queremos felicitar a todos os xogadores e ao corpo técnico polo esforzo, a dedicación e a actitude demostrada durante todo o campionato. Este cuarto posto é un premio ao traballo realizado e unha motivación máis para seguir medrando de cara aos vindeiros retos.

SUBCAMPIONATO GALEGO PARA O COMBINADO BENXAMÍN CW AS MARIÑAS – CW SANTIAGO

O combinado benxamín formado por xogadores e xogadoras do CW As Mariñas e do Club Waterpolo Santiago acadou unha brillante segunda posición no Campionato Galego Benxamín Mixto de Verán disputado en Cervo.

A competición contou cun formato especial no que os dous participantes, o RCN Vigo e o combinado As Mariñas–Santiago, disputaron dous encontros para decidir o título autonómico.

Os partidos estiveron marcados pola igualdade, a emoción e o entusiasmo propio destas categorías de formación. No primeiro encontro, o combinado loitou ata o final pero acabou cedendo por un axustado 5-3 ante o conxunto vigués.

No segundo partido, os máis pequenos ofreceron unha magnífica actuación e lograron un valioso empate a oito goles, nun encontro moi disputado que fixo gozar ao numeroso público presente nas bancadas.

Finalmente, o RCN Vigo proclamouse campión galego, mentres que o combinado formado por xogadores do CW As Mariñas e do CW Santiago acadou unha meritoria segunda posición.

Máis aló dos resultados, a fin de semana serviu para seguir acumulando experiencia competitiva, reforzar a formación dos máis pequenos e continuar construíndo o futuro do waterpolo galego desde a base.